«Ан Наср» ҳужумчиси Жоау Феликс Европа футболига қайтишни режалаштирмоқда. Футболчи Чемпионлар лигасида иштирок этадиган жамоага ўтишни истамоқда ва унинг устувор танлови «Барселона» бўлиб қолмоқда. Бу ҳақда Sport.es хабар берди.
Манбага кўра, футболчининг вакили Жорже Мендеш аллақачон «Барселона» раҳбариятига Феликснинг клубга эркин агент сифатида қайтиш истагини маълум қилган.
Бироқ каталонияликлар ҳозирча 26 ёшли ҳужумчининг қайтишини устувор вазифа сифатида кўрмаяпти. Шу билан бирга, клуб Феликс номзодидан бутунлай воз кечмаган. «Барселона» мавсум якунланганидан кейин жамоанинг эҳтиёжларини таҳлил қилади ва шундан сўнг португалиялик футболчини эркин агент сифатида қўлга киритиш вариантини кўриб чиқиши мумкин.
Феликс 2023/24 йилги мавсумда «Атлетико»дан ижара асосида «Барселона» сафида ўйнаган. У каталонияликлар таркибида барча турнирларда 44 та баҳсда 10 та гол уриб, 6 та голли узатмани амалга оширган.
Маълумот учун, Жоау Феликснинг «Ан Наср» билан амалдаги шартномаси 2027 йил ёзигача мўлжалланган.
Мухлислар бу янгиликни Telegram’да муҳокама қилмоқда
Изоҳлар Telegram’да очилади