«Барселона»нинг собиқ футболчиси Роналдинио Аргентина миллий жамоасидаги фаолиятини якунлаган Лионел Мессига мурожаат қилди. Бразилиялик футболчи ўз хабарида аргентиналик ҳужумчи билан боғлиқ хотиралари ва унинг футболдаги мероси ҳақида фикр билдирди.
«Лео, тарихингнинг илк куниданоқ унинг бир қисми бўлганим қандай завқ, қандай қувонч! Сен бизни табассум қилишга ва футболдан завқланишга мажбур қилардинг. Сенинг номинг Аргентина ва бутун дунё тарихига муҳрланган.
Фақат бизгина болаликдаги орзуни рўёбга чиқариш — мамлакатимиз шарафини ҳимоя қилиш ва жаҳон чемпиони бўлишдан қандай қувонч олишимизни биламиз. Сен миллий жамоанг ва мамлакатинг учун бор кучингни бердинг.
Оила билан боғлиқ барча нарсалар инсонни кўп нарсаларни қайта ўйлаб кўришга мажбур қилишини сени яхши тушунган ҳолда биламан. Ҳаётдан завқлан, ака. Бугун ва ҳар доим сенга энг яхши тилакларни билдираман», — деб ёзди Роналдинио.
Маълумот учун, Месси Аргентина миллий жамоаси сафидаги сўнгги баҳсини Бенинга қарши ўтказди. Учрашувда аргентиналиклар 3:0 ҳисобида ғалаба қозонди. Месси пеналтидан гол уриб, иккита голли узатмани ҳам амалга оширди.
Эслатиб ўтамиз, Месси Аргентина миллий жамоаси билан 2022 йилги жаҳон чемпионати, 2021 ва 2024 йиллардаги Америка кубоги ҳамда 2022 йилги Финалиссимада ғолиб бўлган.
