«Интер Майами» ҳужумчиси Лионел Месси Аргентина миллий жамоасидаги фаолиятини расман якунлади. 39 ёшли футболчининг миллий жамоадаги сўнгги баҳси Бенинга қарши ўртоқлик беллашувига тўғри келди.
Буенос-Айресдаги «Монументал» стадионида ўтган баҳсда Аргентина 3:0 ҳисобида ғалаба қозонди. Месси 71-дақиқада пеналтини аниқ амалга ошириб, жамоасининг учинчи голини урди. Шунингдек, у Николас Отаменди ва яримҳимоячи Нико Паснинг голларига голли узатма берди.
Месси Аргентина миллий жамоаси сафидаги дебютини 2005 йил августида Венгрияга қарши баҳсда ўтказган. У миллий жамоа сафида жами 208 та баҳсда майдонга тушиб, 126 та гол ва 70 та голли узатмага муаллифлик қилди.
Фаолияти давомида Месси Аргентина билан 2022 йилги жаҳон чемпионати, 2021 ва 2024 йиллардаги Америка Кубоги ҳамда 2022 йилги Финалиссимада ғолиб чиқди.
Маълумот учун, Месси миллий жамоалар сафида гол уриш бўйича Криштиану Роналдундан кейин иккинчи ўринда туради. Португалиялик ҳужумчи миллий жамоа сафида 146 та гол урган.
Эслатиб ўтамиз, Месси 2026 йилги жаҳон чемпионатидан кейин Аргентина миллий жамоасидаги фаолиятини якунлашини маълум қилган эди.
Мухлислар бу янгиликни Telegram’да муҳокама қилмоқда
Изоҳлар Telegram’да очилади