«Интер Майами» клуби ҳужумчиси Лионел Месси Аргентина миллий жамоасидаги сўнгги баҳсини Бенинга қарши ўтказди. Буенос-Айресдаги «Монументал» стадионида кечган баҳсда аргентиналиклар 3:0 ҳисобида ғалаба қозонди. Месси пеналтидан гол уриб, яна иккита голли узатмани амалга оширди.
Баҳсдан сўнг Месси мухлислар қаршисида сўнгги бор нутқ сўзлади.
«Бугун бирор нарса дейиш қийин, мени ҳис-туйғуларим қамраб олган, хаёлимда жуда кўп фикрлар бор. Мен ўйлаётган биринчи инсон — отам. Қила оладиган ягона ишим — аввал хайрлашув мактубимда қилганимдек, миннатдорчилик билдириш», — деди аргентиналик футболчи.
«Бу футболкани 20 йилдан ортиқ вақт давомида кийиш мен учун катта фахр бўлди. Ҳатто энг оғир пайтларда ҳам курашишни тўхтатмадим, бор кучимни бердим ва доимо сафда бўлдим. Жамоа билан хайрлашиш менга қаттиқ оғриқ беради. Қасам ичаман, бутун умрим давомида бу ерга келишни истардим. Чунки Аргентина миллий жамоасида ўйнаш — мен билан содир бўлиши мумкин бўлган энг яхши воқелик», — дея Месси сўзларини келтиради TyC Sports.
Маълумот учун, Месси Аргентина миллий жамоаси сафида 208 та баҳсда 126 та гол ва 70 та голли узатмани қайд этди. У жамоа билан 2022 йилги жаҳон чемпионати, икки марта Америка кубоги ҳамда 2022 йилги Финалиссимада ғолиб бўлган.
Мухлислар бу янгиликни Telegram’да муҳокама қилмоқда
Изоҳлар Telegram’да очилади