«Челси» ҳужумчиси Морган Рожерс Англия Лига кубоги нимчоракфиналида «Ливерпул»га қарши кечган ва пеналтилар сериясида якунланган баҳсдан сўнг ўз таассуротлари билан ўртоқлашди. Асосий вақт 1:1 ҳисобида тугади, пеналтилар сериясида эса мерсисайдликлар 6:5 ҳисобида ғалаба қозонди.
«Менимча, бу мағлубиятнинг энг ёмон усули. Ўйин тенг кечди, айрим вақтларда ҳатто устунликка ҳам эга бўлдик. Биринчи бўлимда стадиондаги шовқинни пасайтиришга, майдонга мослашишга ва ҳисобни очишга эришдик. Аммо орадан жуда қисқа вақт ўтиб, жавоб голини ўтказиб юбориш оғир бўлди», — деди Рожерс «Челси» расмий сайтига.
Ҳужумчининг таъкидлашича, жамоа иккинчи бўлимни ҳам яхши бошлаган ва бир неча бор олдинга чиқиш имкониятига эга бўлган. Баҳс якунига яқин ҳам лондонликларда вазиятлар юзага келган.
«Бир оз ҳафсалам пир бўлди. Ўзимда ҳам голга айлантиришни истаган бир нечта имкониятлар бўлди. Рақибда ҳам шундай вазиятлар юзага келди.
Биз муносиб ўйин кўрсатдик, баҳс жуда сифатли кечди. Бу натижа ҳар қандай томонга ўзгариши мумкин бўлган ўйинлардан бири эди. Энди буни қабул қилишимиз керак», — дея қўшимча қилди футболчи.
Маълумот учун, ушбу баҳсда Рожерс 40-дақиқада «Челси»ни ҳисобда олдинга олиб чиққан. Коди Гакпо эса уч дақиқадан сўнг «Ливерпул»нинг жавоб голини урган.
Эслатиб ўтамиз, пеналтилар сериясидаги 6:5 ҳисобидаги ғалабадан сўнг «Ливерпул» Англия Лига кубоги чоракфиналига йўл олди.
