«Барча даврларнинг «Олтин тўпи» сизларга ҳам тегишли» — Роналду

«Ан Наср» клуби ҳужумчиси ва Португалия миллий жамоаси сардори Криштиану Роналду «Барча даврларнинг «Олтин тўпи» номинациясида ғолиб бўлганидан сўнг ижтимоий тармоқларда мурожаат эълон қилди.

«Футбол мухлисларга тегишли ўйин! Бутун дунёдаги барча мухлисларга раҳмат. «Барча даврларнинг «Олтин тўпи» сизларга ҳам тегишли», — деб ёзди португалиялик футболчи Х ижтимоий тармоғида.

Мухлислар ўртасида ўтказилган онлайн овоз бериш якунларига кўра, рейтингда Роналдунинг 2008 йилда қўлга киритган «Олтин тўп» соврини биринчи ўринни эгаллади.

Мазкур номинацияда «Олтин тўп»ни бир неча бор қўлга киритган футболчиларнинг совринлари иштирок этди. Улар орасида Лионел Месси (8 та), Криштиану Роналду (5 та), Йохан Кройфф (3 та), Мишел Платини (3 та), Марко ван Бастен (3 та), Алфредо Ди Стефано (2 та), Франц Беккенбауер (2 та), Кевин Киган (2 та), Карл-Хайнс Румменигге (2 та) ва Роналду (2 та) бор.

Маълумот учун, Криштиану Роналду фаолияти давомида «Олтин тўп»ни 5 марта қўлга киритган. Унинг асосий рақиби Лионел Месси эса 8 карра совриндор ҳисобланади.

Эслатиб ўтамиз, Роналду ҳозирда Саудия Арабистонининг «Ан Наср» клубида тўп тепмоқда.