«Ан Наср» ҳужумчиси Криштиану Роналдунинг «Ал Файсали»га қарши баҳсда урилган иккинчи гол муаллифлиги юзасидан юзага келган баҳсга ойдинлик киритилди. Саудия Арабистони чемпионати ушбу голни дастлаб португалиялик футболчи ҳисобига ёзган, бироқ ФИФА уни автогол сифатида қайд этган эди.
Журналист Абдулазиз ал Мурайселнинг ижтимоий тармоқларда хабар беришича, Про-лиганинг қоидаларга риоя этилишини назорат қилувчи комиссияси вазиятни текширган. Якунда гол автогол эмас, айнан Роналду томонидан урилгани аниқланган.
«Криштиану Роналду гол муаллифи эканини тасдиқлаш учун барча расмий чоралар кўрилди», — деб ёзди журналист.
Ал Мурайселнинг маълумотига кўра, гол Роналду ҳисобига ёзилгани ҳақидаги хабар футболчининг ўзига ҳам етказилган. Шу тариқа, португалиялик ҳужумчининг фаолияти давомидаги голлари сони 982 тага етган.
Маълумот учун, гол муаллифлиги борасидаги келишмовчилик Саудия Арабистони чемпионати ва ФИФА қайдларидаги фарқ сабаб юзага келган.
