Португалия миллий жамоасининг собиқ яримҳимоячиси Манише ҳужумчи Криштиану Роналду фаолиятини 29 ёки 30 ёшида якунлаши мумкин бўлганини айтди. Унинг фикрича, португалиялик юлдуз ўша вақтдаёқ молиявий барқарорликка эришган ва Чемпионлар лигасида ғолиб чиққан бўлса-да, футболга бўлган иштиёқи сабаб майдонда қолишни танлаган.
«40 ёшида ҳам футбол ўйнаш учун ниҳоятда профессионал бўлиш ва ўз касбингга чуқур ҳурмат билан ёндашиш керак. Бунга фақат омад орқали эришиб бўлмайди. У ёш футболчилар учун намуна: фақат пул ҳақида ўйламаслик, чўққига чиқиш учун кўплаб ишларни тўғри бажариш керак», — дея Манишенинг сўзларини келтиради FourFourTwo.
Собиқ яримҳимоячининг таъкидлашича, Роналду 29 ёки 30 ёшидаёқ фаолиятини якунлаш учун етарлича асосга эга бўлган. Бироқ ҳужумчининг рақобатга бўлган муҳаббати ва энг яхши бўлиш истаги уни футбол ўйнашда давом этишга ундаган.
«У 29 ёки 30 ёшида фаолиятини якунлаши мумкин эди, чунки ўша пайтдаёқ молиявий жиҳатдан тўлиқ таъминланган ва Чемпионлар лигасида ғолиб бўлганди. Аммо у рақобатлашишни, ўзидан бор кучини чиқаришни ва юлдуз бўлишни яхши кўради. У дунёдаги энг яхши футболчи бўлишни ва одамлар у ҳақида гапиришини ёқтиради. Бу унинг шахсиятининг бир қисми», — деди Манише.
Маълумот учун, Криштиану Роналду ҳозирда Саудия Арабистонининг «Ан Наср» клубида тўп тепмоқда. У Португалия миллий жамоаси сафида ҳам фаолиятини давом эттирмоқда.
Telegram’да биринчи бўлиб фикр билдиринг
Муҳокамага ўтишИзоҳлар Telegram’да очилади