Саудия Арабистонининг «Ан Наср» клуби ҳужумчиси Криштиану Роналду Португалия миллий жамоасидаги фаолиятини якунлаши ҳақида яна бир бор фикр билдирди. У ижтимоий тармоқдаги саҳифасида эълон қилинган видеода миллий жамоа сафидаги йўлини фахр билан якунлаётганини таъкидлади.
«Бугун миллий жамоа либосида футбол майдонидаги йўлим ниҳоясига етмоқда. Мен бошимни баланд кўтарган ҳолда, босиб ўтган йўлимдан фахрланиб кетмоқдаман. Португалия учун қўлимдан келган барча ишни қилганимни биламан. Аммо ҳеч қачон сизлардан бири бўлишдан тўхтамайман. Ҳар доимгидек, Португалиянинг ҳар бир ғалабасидан қувонишда, ҳаяжонланишда ва уни нишонлашда давом этаман.
Бутун умрим давомида дунёнинг энг яхши футболчиси бўлишга интилдим. Аммо бугун энг катта ғалабам дунёнинг энг яхши мамлакати шарафини ҳимоя қилишдек шарафга муяссар бўлганим эканини англадим», — деди Роналду.
Ҳужумчи мухлисларга 23 йил давомида билдирган ишончи ва болаликдаги орзусини рўёбга чиқариш имконини бергани учун ташаккур айтди. У Мадейрада яшаган кезларида тўп ортидан югуриб юрган кичик болакайнинг орзуси амалга ошганини таъкидлади.
«Ушбу либосни кийганимдан фахрланиш туйғуси мен билан абадий қолади. Португалия доимо қалбимнинг бир қисми бўлиб қолади», — дея сўзларини якунлади футболчи.
Маълумот учун, Роналду Португалия миллий жамоасидаги дебютини 2003 йил 20 август куни Қозоғистонга қарши баҳсда ўтказган.
Эслатиб ўтамиз, 41 ёшли ҳужумчи Португалия сафида 234 та баҳсда майдонга тушиб, 146 та гол урган. У миллий жамоа билан Европа чемпионати ва икки бор Миллатлар лигасида ғолиб чиққан.
Мухлислар бу янгиликни Telegram’да муҳокама қилмоқда
Изоҳлар Telegram’да очилади