Тен Ҳаг: «Роналду Португалиядан устун бўлиши мумкин эмас. Аргентинада ҳамма Месси атрофида бирлашди»

«Твенте» клубининг техник директори, аввал «Манчестер Юнайтед» жамоасини бошқарган Эрик тен Ҳаг Португалия миллий жамоасида «Ан Наср» ҳужумчиси Криштиану Роналду билан боғлиқ можаро юзасидан ўз фикрини билдирди.

Аввалроқ 41 ёшли футболчи бош мураббий Жорже Жезуш билан юзага келган келишмовчилик ортидан миллий жамоа ихтиёрини ўзбошимчалик билан тарк этганди. Бу ҳаракати учун у 255 евро миқдорида жаримага тортилди.

«Ҳеч ким клуб ёки мамлакат манфаатларидан устун бўлиши мумкин эмас. Ҳатто Криштиану Роналду ёки Месси ҳам. Жамоа ҳар доим биринчи ўринда туриши керак.

Аввал ҳам айтганимдек, ҳар қандай кучли жамоа ўз юлдузларини қадрлаши керак. Бироқ юлдузлар ҳам жамоа манфаатларига бўйсуниши шарт. Агар юлдуз футболчи буни қилмаса, муваффақиятга эришишнинг иложи йўқ. Бундай ҳолатда ҳаммаси барбод бўлади.

Айтганча, Мессининг ўзига хос жиҳати — унинг Аргентина миллий жамоасидаги фаолиятидир. Бу жараённи кузатиш ажойиб эди. Бироқ бунинг учун Мессининг ўзи ҳам жуда катта меҳнат қилди. Ҳамма унинг атрофида бирлашди, барча унинг учун ҳаракат қилди. Аммо у ҳам жамоага жуда катта ҳисса қўшганини алоҳида таъкидлаш керак», — дея тен Ҳагнинг сўзларини келтиради ESPN.

Аввалроқ нидерландиялик мутахассис Роналдунинг сўнгги 7-8 йилда аввалги даражада ўйнамагани ҳақида гапирганди.