Саудия Арабистонининг «Ан Наср» клуби ҳужумчиси Криштиану Роналду Португалия миллий жамоасидаги фаолиятини якунлаганини эълон қилганидан сўнг, жамоадошлари, мураббийлар штаби, мухлислар ва оиласига миннатдорлик билдирди. У бу ҳақда ижтимоий тармоқдаги саҳифасида эълон қилинган видеода сўз юритди.
«Миллий жамоадаги жамоадошларимга алоҳида мурожаат қилмоқчиман. Ҳар бир югуриш, қучоқлаш, баҳс, майдонга чиқиш олдидан ўтган сокин дақиқалар, биргаликда нишонлаган ғалабалар ва бизни кучлироқ қилган мағлубиятлар учун раҳмат. Сизларга сардорлик қилиш мен учун шараф эди. Аммо сардор ҳеч қачон ёлғиз юрмайди — ҳар бирингиз менинг тарихимнинг бир қисмига айландингиз», — деди Роналду.
41 ёшли футболчи шу йиллар давомида у билан бирга ишлаган мураббийлар, раҳбарлар, шифокорлар, физиотерапевтлар, маъмурий ходимлар ва бошқа мутахассисларга ҳам ташаккур айтди. Унинг таъкидлашича, кўпчилик камера қаршисида кўринмаган бўлса-да, уларнинг меҳнатисиз эришилган натижалар ва тарихий лаҳзалар бўлмасди.
Роналду оиласига ҳам алоҳида миннатдорлик билдирди. У яқинлари узоқ сафарлар, қурбонликлар ва миллий жамоа сабабли бирга ўтказилмаган вақтларни тушуниб, бу орзуни у билан баҳам кўрганини қайд этди.
Португалиялик мухлисларга мурожаат қилар экан, ҳужумчи миллий мадҳия янграган пайтдаги туйғуларни ҳеч қачон унутмаслигини айтди. Унинг фикрича, бундай лаҳзаларда клубга мухлислик, ижтимоий мавқе ва бошқа фарқлар йўқолади, барчани ягона туйғу — Португалияга бўлган муҳаббат бирлаштиради.
Маълумот учун, Роналду Португалия миллий жамоасидаги дебютини 2003 йил 20 август куни Қозоғистонга қарши баҳсда ўтказган. У ўша пайтда 18 ёшда эди.
Эслатиб ўтамиз, Роналду Португалия сафида 234 та баҳсда майдонга тушиб, 146 та гол урган. У миллий жамоа билан 2016 йилги Европа чемпионати ҳамда икки марта Миллатлар лигасида ғолиб чиққан.
Мухлислар бу янгиликни Telegram’да муҳокама қилмоқда
Изоҳлар Telegram’да очилади