«Реал» президентлигига номзод Энрике Рикелме сайловда ғалаба қозонган тақдирда Юрген Клоппни бош мураббий этиб тайинламоқчи. Бу ҳақда машҳур инсайдер Фабрицио Романо маълум қилди.
«Энрике Рикелме тез орада бош мураббийлик учун кўраётган номзодини эълон қилади. Менинг манбаларимга кўра, бу Юрген Клопп бўлиши керак. Флорентино Переснинг номзоди Жозе Моуринио экани аллақачон расман маълум. Футбол оламидаги манбалар эса Энрике Рикелме томонидан илгари сурилиши мумкин бўлган номзод сифатида Клоппни тилга олмоқда. Бироқ якуний қарор ва стратегия ҳақида Рикелменинг ўзи мухлисларга маълум қилади», — деди Романо.
Қайд этилишича, Юрген Клопп 2024 йилда «Ливерпул»ни тарк этганидан буён бирор клубда мураббийлик қилмаган.
Эслатиб ўтамиз, «Реал» президентлиги учун сайлов 7 июн куни бўлиб ўтади.
Маълумот учун, Юрген Клопп фаолияти давомида «Боруссия Дортмунд» ва «Ливерпул» билан кўплаб совринларни қўлга киритган.
