«Барселона» Ансу Фатининг «Монако»га эҳтимолий трансфери бўйича музокараларда қўшимча шартлар киритишга интилмоқда.
Аввалроқ Франция клуби футболчини 11 миллион евро эвазига сотиб олмоқчи экани ва ўйинчи билан келишувга эришгани ҳақида хабарлар тарқалганди.
Бироқ манбаларга кўра, битимнинг якунланиши кечикмоқда. Сабаби, «Барселона» шартномага ўз тарбияланувчисини келажакда қайта сотиб олиш имкониятини берувчи банд ёки кейинги трансфердан фоиз олиш ҳуқуқини киритмоқчи.
Каталония клуби Фатининг нисбатан арзон нархда сотилиб, кейинчалик «Монако» томонидан юқори суммага бошқа клубга трансфер қилинишини истамаяпти.
Шунингдек, «Барселона» футболчи учун янада йирикроқ таклиф келишига ҳам умид қилаётгани айтилмоқда.
Эслатиб ўтамиз, Ансу Фати бир вақтлар «Барселона»нинг энг истиқболли тарбияланувчиларидан бири сифатида эътироф этилган эди.
Маълумот учун, ҳужумчи сўнгги мавсумларда жароҳатлар ва ўйин амалиёти билан боғлиқ муаммолар сабаб ўзининг аввалги даражасини намойиш эта олмади.
