«Реал» ҳам Мбаппенинг сўзлари учун Хитойдан узр сўради

«Реал» Килиан Мбаппенинг Хитой коммунистик партияси етакчиси бўлган Мао Цзэдун ҳақидаги гаплари учун узр сўради.

Эслатиб ўтамиз, франциялик ҳужумчи ўзини диктатор сифатида тасвирлаган мемлар ҳақидаги саволга жавоб берар экан, шундай деган эди: «Мени энг кўп кулдиргани — хитойлик диктатор Мао Цзэдун қиёфасида тасвирлаган мем бўлди. Уни дўстларим билан мулоқотда тез-тез ишлатаман».

Шундан сўнг Хитойнинг учта компанияси футболчи билан ҳамкорликни тўхтатди. Шунингдек, Хитойда Испания чемпионати ўйинларини намойиш этиш вақтинча тўхтатилди.

Кейинчалик Испания Ла Лигаси, унинг президенти Хавиер Тебас ва Мбаппенинг ўзи омма олдида узр сўрашди.

Энди эса «Реал» ҳам баёнот бериб, узр сўради.

«Реал Мадрид» клуби футболчимиз Килиан Мбаппенинг яқинда билдирган фикрлари туфайли Хитой халқи вакилларида юзага келган салбий ҳис-туйғулар учун узр сўрайди.

Клубимиз Хитойга, унинг тарихи, маданияти ва фуқароларига, шунингдек, «Реал»ни меҳр ва ҳавас билан қўллаб-қувватлайдиган миллионлаб хитойлик мухлисларга чуқур ҳурмат билан қарайди.

Клуб Килиан Мбаппенинг омма олдида билдирган узрларига қўшилади. Футболчи ўз сўзларидан афсусда эканини билдириб, Хитой халқига бўлган ҳурматини яна бир бор тасдиқлади.

«Реал Мадрид» ҳурмат, биргаликда тинч-тотув яшаш ва маданиятлар ўртасидаги ўзаро тушуниш қадриятларига содиқ. Шунингдек, Хитой ва унинг фуқаролари билан клубни боғлаб турган дўстлик ва меҳр ришталарини янада мустаҳкамлаш истагини билдиради», — дейилади Мадрид клуби баёнотида.