«Борнмут» ҳужумчиси Эли Жуниор Крупи нуфузли клублардан бирига ўтишни хоҳлаётганини тан олди.
«Дунёнинг энг йирик клубларидан бирига ўтиш учун бор кучимни ишга соламан. Аммо «Борнмут»да эканман, мухлислар учун ва жамоанинг яхши натижаларга эришишига ёрдам бериш учун ҳаракат қилишда давом этаман», - деди франциялик ҳужумчи DAZN France телеканалига берган интервюсида.
Крупининг қўшимча қилишича, агар ўтган ёзда жароҳат олмаганида, бу мавсумда «Борнмут»да қолмаслиги ҳам мумкин бўлган. Ўша пайтда Европанинг кўплаб клублари футболчини ўз сафига қўшиб олмоқчи эди.
Маълумот учун, 20 ёшли франциялик жароҳат туфайли мавсум стартини ўтказиб юборди. У атиги бир неча кун олдин «Манчестер Юнайтед»га қарши ўйинда (3:0) сафга қайтди.
