«ПСЖ» яримҳимоячиси Сенни Маюлу клуб билан янги узоқ муддатли шартнома имзолади. Бу ҳақда таниқли инсайдер Фабрицио Романо хабар берди.
Манбага кўра, барча ҳужжатлар расмийлаштирилган ва 19 ёшли футболчи 2031 йилнинг июнига қадар мўлжалланган янги битимга имзо чеккан.
Аввалроқ журналист Фабрис Хокинс ҳам томонлар келишувга эришганини маълум қилганди.
Қайд этилишича, Англиянинг икки топ-клуби Маюлуга жиддий қизиқиш билдирган. Бироқ футболчининг ўзи Парижда қолишни афзал кўрган.
Маюлу «ПСЖ» академиясининг энг ёрқин тарбияланувчиларидан бири ҳисобланади ва клуб раҳбарияти уни жамоа келажагининг муҳим қисми сифатида кўрмоқда.
Ёш футболчи сўнгги мавсумларда асосий таркибга яқинлашиб, ўзининг техникаси, ўйин интеллекти ва универсаллиги билан мутахассислар эътиборини қозонган.
Шу тариқа, «ПСЖ» Европанинг етакчи клублари қизиқишига қарамай, ўзининг навбатдаги истеъдодини узоқ муддатга жамоада сақлаб қолишга эришди.
