Мадриднинг «Реал» клуби ҳужумчиси Винисиус Жуниор ёзги трансферлар ойнасида жамоани тарк этиши мумкин.
Журналист Игнасио Санчеснинг хабар беришича, «қироллик клуби» бразилиялик футболчига шартномани узайтириш бўйича фақат битта расмий таклиф бермоқчи. Таклиф шартлари эса футболчи ва унинг вакиллари кутаётган даражадан анча паст бўлади.
Манбага кўра, мадридликлар ҳозирча Винисиусга бошқа клублардан аниқ таклифлар йўқлигини яхши билади.
Шунингдек, «Реал» бош мураббийи Жозе Моуринио футболчини имкон қадар тезроқ сотиш ёки ҳеч бўлмаганда янги шартнома таклиф қилишдан олдин унинг мавсум давомидаги самарадорлигини кузатишни маъқул кўрмоқда.
Португалиялик мутахассиснинг фикрича, агар Винисиус 2027 йил ёзида эркин агент сифатида жамоани тарк этса ҳам, футболчининг трансферига сарфланган маблағ аллақачон ўзини оқлаб бўлган.
Маълумот учун, Винисиус Жуниор 2018 йилдан буён «Реал» сафида тўп тепмоқда. Бразилиялик ҳужумчи клуб билан бир неча бор Ла Лига ва Чемпионлар лигаси совринларини қўлга киритган ҳамда жамоанинг асосий етакчиларидан бири сифатида эътироф этилади.
