Мадриднинг «Реал» клуби дарвозабони Тибо Куртуа грипп билан касаллангани сабабли Испания чемпионати 10-туридан ўрин олган «Барселона»га қарши учрашувда иштирок этмайди. Бу ҳақда «қироллик клуби» матбуот хизмати расмий сайтида маълум қилди.
Белгиялик дарвозабоннинг ўрнига «Реал» қайдномасига 19 ёшли голкипер Илля Волошин киритилди. Шунингдек, жамоа таркибидан украиналик дарвозабон Андрей Лунин ҳам ўрин олган.
Маълумот учун, «Барселона» ва «Реал» ўртасидаги учрашув Тошкент вақти билан 25 октябрдан 26 октябрга ўтар кечаси соат 01:00да бошланади.
Куртуа бу мавсумда барча мусобақалар доирасида 12 та учрашувда иштирок этиб, иккита баҳсда ўз дарвозаси дахлсизлигини сақлаб қолган. Дарвозабоннинг «Реал» билан амалдаги шартномаси 2027 йилнинг ёзига қадар мўлжалланган. Transfermarkt портали маълумотларига кўра, унинг бозор қиймати 15 миллион еврони ташкил этади.
