Ислом Исмоилов: «Муносиб натижага эришиш учун келдик. «Ан Наср» фақат Роналду эмас»

ОФК Элит Осиё Чемпионлар лигаси 2-туридан ўрин олган «Ан Наср» — «Нефтчи» баҳси олдидан ўтказилган матбуот анжуманида меҳмонлар бош мураббийи Ислом Исмоилов бўлажак ўйин ва рақибнинг имкониятлари ҳақида ўз фикрларини билдирди.

— Ассалому алайкум! Рақибимиз — Осиёнинг энг кучли жамоаларидан бири бўлган «Ан Наср». Уларнинг таркибида жаҳон футболида ўз ўрнига эга бўлган, юқори савияли ва катта тажрибага эга футболчилар тўп тепишади.

Албатта, бу — биз учун жуда муҳим учрашувлардан бири. Биз Ар Риёдга шунчаки майдонга тушиб, ўйин ўтказиш учун эмас, балки муносиб натижага эришиш мақсадида келдик. Рақибнинг кучини яхши биламиз, шу билан бирга, ўз имкониятларимизга ҳам ишонамиз.

Бўлажак баҳсда бор кучимиз, маҳоратимиз ва жамоавий бирдамлигимизни ишга соламиз. Майдонда охиригача курашиб, чиройли футбол намойиш этиш ва Фарғона ҳамда бутун Ўзбекистон халқини хурсанд қилиш учун ҳаракат қиламиз.

— «Ан Наср» жамоасининг таркиби ҳақида қандай фикрдасиз?

— Жуда кучли футболчилардан таркиб топган жамоа. Уларнинг индивидуал маҳорати ва халқаро тажрибаси юқори эканини яхши биламиз. Бироқ биз ҳам ўз имкониятларимизга ишонамиз. Рақибнинг кучли томонларини ҳисобга олган ҳолда, ўз ўйинимизни намойиш этишга интиламиз. Асосий мақсадимиз — майдонда муносиб кураш олиб бориш, чиройли футбол кўрсатиш ва ижобий натижага эришиш.

— Криштиану Роналдунинг ўйинини чеклаш учун алоҳида тактика ишлаб чиқилганми?

— Криштиану Роналду — жаҳон футболининг энг ёрқин юлдузларидан бири. Унинг маҳорати, тажрибаси ва гол уриш қобилиятини алоҳида таъкидлаш мумкин. Унга ҳурмат билан қараймиз ва унинг имкониятларини яхши тушунамиз. Аммо биз фақат Роналдуга қарши эмас, балки бутун «Ан Наср» жамоасига қарши ўйнаймиз. Шу сабабли асосий эътиборимиз рақибнинг умумий ўйинига, жамоавий ҳаракатларига ва майдондаги вазиятларга қаратилади. Биз учун энг муҳими — интизомли ҳаракат қилиш, белгилаган режаларга амал қилиш ва жамоа сифатида ўз имкониятларимизни намойиш этиш.

Эслатиб ўтамиз, «Ан Наср» — «Нефтчи» ўйини 12 октябр куни Ар Риёд шаҳридаги «Ал Аввал Парк» стадионида бўлиб ўтади.