Ислом Аҳмедов: «Футболчилар бошқача «настрой» билан майдонга тушишди»

«Андижон» клуби Ўзбекистон Кубоги чоракфиналида Зоминда «Сўғдиёна» устидан 2:1 ҳисобида ғалаба қозониб ярим финал йўлланмасини қўлга киритди.

Беллашувдан кейинги матбуот анжуманида ғолиб жамоа бош мураббийи Ислом Аҳмедов фикрлари билан ўртоқлашди.

- Ғалаба билан Андижон халқимизни ва қолаверса, бу ерга келиб бизни қўллаб-қувватлаган мухлисларимизни табриклайман ҳамда уларга каттакон раҳмат айтамиз. Ўйинга келадиган бўлсак, оғир кечишини билгандик. Сабаби, футболчиларимизда бироз руҳий тушкунлик бор эди. Охирги учрашувларда омад етишмаётганди. Худога шукр, бу сафар ёқимсиз анъанага чек қўйиб ғалабага эришдик. Футболчиларимиз ўйинни яхши назорат қилишди. Якунда ғалабага эришдик.

- «Андижон» чемпионатдаги охирги учта турда мағлубиятга учраганди ва чорак финал олдидан уларни руҳий томонлама тиклаш, мотивация бериб уйғотиш мураббий сифатида сизга қўшимча муаммолар туғдирмадими?

- Очиғи, футболчиларни ўзларига бўлган ишончини қайтариш қийин бўлди. Бироқ бошида айтганмиз, натижа учун биз жавобгармиз. Ҳаммасини ўз бўйнимизга олиб, фалсафамиздан четга чиқмаган ҳолда тўпни назорат қилиб, ҳужумлар уюштириш борасида уларга уқтирдик. Қанақа натижа бўлишидан қатъий назар ўз ўйинимиздан четга чиқмаймиз. Фақат охирига келганда мувозанатни йўқотмаслик борасила етарлича тушунчалар бергандик. Худога шукр, йигитлар яхши ҳаракат қилиб, майдонда охиригача курашишди. Бугун бошқача «настрой» билан майдонга тушишди.

- Мартин Боаке фаол ўйнади. У гол урди, афсуски, охирида қизил карточка ҳам олди. Бунга қандай изоҳ берасиз?

- Буни ҳакам баҳолайди. Бош ҳакам шундай қарор қабул қилди, уларни ишига аралаша олмаймиз.

- Маҳмуд Маҳамаджоновни трансферидан кейин чап қанотда муаммолар кўзга ташланаётгандек туюлди. Бу муаммони ҳал қилиш учун қўшимча ечимлар борми?

- Рости, чемпионат ўртасида Маҳамаджонов кетиб қолди. Шу боис биз ўйинчи ололмадик. Ҳимоячи олишга ҳаракат қилдик, лекин қўлга кирита олмадик. Айнан чап қанот ҳимоячиси йўқ. Иложи йўқлигидан у позицияда ўнг оёқда ўйнайдиган ўйинчиларимизни ўйнатяпмиз. Қўлдан келганича ўзимизни бор футболчиларимиздан ечим топишга ҳаракат қиляпмиз», - дея Аҳмедовнинг сўзларини келтиради Tribuna.uz журналисти.