Улуғбек Бақоев: «Андижон» жамоасини яримфиналга чиққани билан табриклайман ва Кубокда омад тилайман»

Зоминда бўлиб ўтган «Сўғдиёна» - «Андижон» баҳсида 1:2 ҳисоби қайд этилди ва унга кўра жиззахликлар ўз уйида мағлуб бўлган ҳолда Кубокни чорак финалда якунлашди.

Беллашувдан сўнг мезбонлар устози Улуғбек Бақоев матбуот анжуманида саволларга жавоб берди.

- Менимча, ўйин жуда яхши ўтди. Биринчи бўлим ҳам, иккинчи бўлим ҳам кўнгилдагидек бўлди. Айтарли муаммолар кузатилмади. Ўйин сифати яхши бўлди, ҳужумлар ҳам кўп бўлди — позицион ҳужумлар ҳам, қарши ҳужумлар ҳам. «Андижон»да ҳам, бизда ҳам гол уриш учун вазиятлар бўлди.

Умуман олганда, бутун ўйин менга ёқди. Йигитлар яхши ҳаракат қилишди. Уларга бутун ўйин давомидаги фидойилиги ва кўрсатган ўйин сифати учун катта раҳмат айтаман. Томошабинлар учун ҳам қизиқарли баҳс бўлган бўлса керак.

Учрашув 2:1 ёки 2:2 ҳисобида ҳам якунланиши мумкин эди, аммо офсайд қайд этилди. «Андижон» жамоасини ярим финалга чиққанлиги билан табриклайман ва Кубокда омад тилайман.

- Бугунги ўйин режаларингиз асосида ўтдими? Ғалаба қозониш учун жамоага айнан нима етишмади?

- Умуман олганда, ҳа. Ҳаммаси режалаштирганимиздек кечди. Ҳамма нарса яхши эди. Фақат «Андижон» биринчи бўлиб гол урганидан кейин уларга ўйнаш осонлашди. Агар биринчи бўлиб биз гол урганимизда, эҳтимол, бизга ҳам осонроқ бўларди. Биринчи бўлимда ҳисоб 0:0 бўлиб турганида, гол уриш учун вазиятларимиз бўлди. Иккинчи бўлимда ҳисоб 0:1 бўлганида ҳам имкониятлар пайдо бўлди. Демак, режалаштирган ишларимизнинг аксариятини амалга оширдик. Аммо иккита гол ўтказиб юборганимиз ёмон бўлди.

- Улуғбек ака, бунгача иккала жамоа чемпионат доирасида куч синашганди. Ўша ўйин билан бугунги учрашув ўртасида қандай фарқ бўлди, деб ўйлайсиз?

- Албатта, бунинг таъсири катта. Биринчидан, йўл масаласи бор. Иккинчидан, майдон қопламаси фарқ қилади. Бу ердаги майдон юмшоқроқ, биз машғулот ўтказадиган майдон эса қаттиқроқ.

Бундан ташқари, Жиззахда ўйнаётганингизда бутунлай бошқача муҳитни ҳис қиласиз. Муҳит ҳам, йўл ҳам, бошқа омиллар ҳам ўз таъсирини кўрсатади. Буларнинг барчаси йиғилиб келади. Шунинг учун Жиззахдаги ўйинларни тезроқ бошлаганимиз маъқул эди.

- Биринчи бўлимда кўрдик, Дориевга вазият яратиш учун рақиб ҳимоячилари деярли имконият беришмади. Иккинчи бўлимда бу борада тактик ўзгариш қилишни ўйламадингизми?

- Нима учун ўзгартиришимиз керак эди? Унинг ўйини яхши чиқди, фақат «Андижон» футболчилари уни бирга-бир вазиятларда ёлғиз қолдиришмади. Доим уни суғурталашди, икки-уч киши бўлиб қуршаб олишди. Дориев юқори савияли футболчи. Шунинг учун рақиблар унга муносиб тарзда, ҳурмат билан муносабатда бўлишади.

- Саволга қўшимча қилмоқчиман. Аввалги ўйинларда Дориевнинг ўнг қанотдан чап қанотга, вазиятга қараб эса марказий ҳужумга ўтганини кўрганмиз. Агар бир қанотда имкониятлар камайса ёки омади келмаса, позициясини ўзгартирган. Бугун эса асосан чап қанотда ҳаракат қилди. Уни бошқа қанотга ўтказиш ёки марказий ҳужумчи сифатида ўйнатиш режангизда бор эдими?

- Бу муҳим эмас. У чапда ҳам, ўнгда ҳам, олдинда ҳам ўйнаши мумкин. Футболчилар вазият ва ўйин эпизодидан келиб чиқиб, позицияларини ўзгартиришлари мумкин. Бугун шундай бўлди, кейинги ўйинларда ҳам уларнинг жойлашуви ўзгариб туради. Ҳужумдаги футболчилар вазиятдан келиб чиқиб, қарорларни ўзлари қабул қилишади.

- Сизнинг фикрингизча, бу йил Кубокда қайси жамоа ғолиб бўлади?

- Менинг тахминимни сўраяпсизми? Буни айтиш қийин. Ўз фикрларим бор, лекин ҳеч кимни хафа қилишни истамайман. Раҳмат!», - дея Бақоевнинг сўзларини келтиради Tribuna.uz журналисти.