“Барселона” ҳужумчиси Ферран Торрес фаолиятини “ПСЖ”да давом эттиришга розилик берди. Испаниянинг Sport.es нашрининг ёзишича, 26 ёшли футболчи Париж клубига “яшил чироқ” ёққан ва энди томонлар трансферни амалга ошириш учун расмий музокараларни бошлаши кутилмоқда.
Манба маълумотларига кўра, Франция чемпиони бош мураббийи Луис Энрике Торресни жамоанинг асосий трансфер мақсадларидан бири, деб ҳисобламоқда. Испаниялик мутахассис ҳужумчи билан шахсан мулоқот қилиб, унга жамоада муҳим ўрин ажратилишини билдирган. Шунинг ортидан Торрес “ПСЖ”нинг таклифини қабул қилишга қарор қилган.
Sport.esʼнинг таъкидлашича, Париж клуби яқин кунларда “Барселона”га расмий таклиф юборади. Каталония клуби аввалроқ Торресни сақлаб қолишни исташини билдирган бўлса-да, муносиб молиявий таклиф тушса, трансферга қаршилик қилмаслиги мумкин. Шу боис келишувнинг асосий қисми клублар ўртасидаги музокараларга боғлиқ бўлиб турибди.
Ҳозирда ҳар икки клуб ҳужум чизиғини қайта шакллантириш устида иш олиб бормоқда. “Барселона” ҳали ҳам Хулиан Алварес трансферини амалга оширишга умид қиляпти ва Торреснинг эҳтимолий сотилиши бу йўналишда клубнинг молиявий имкониятларини кенгайтириши мумкин. “ПСЖ” эса яқинда Рандал Коло Муанини “Ювентус”га сотиб, янги ҳужумчи учун маблағ ҳосил қилди.
Нашр ёзишича, барча иштирокчи томонлар трансфер ҳақида хабардор ва битимни Испания терма жамоаси футболчилари машғулотларга қайтишидан олдин якунлашни хоҳламоқда. Бироқ ҳозирча на “Барселона”, на “ПСЖ” музокаралар бошланганини расман тасдиқлаган.
Мухлислар бу янгиликни Telegram’да муҳокама қилмоқда
Изоҳлар Telegram’да очилади