Мадриднинг «Реал» клуби янги аъзоси Карлос Эспининг голи жамоага Ла Лига 1-тур доирасидаги «Эспанёл»га қарши ўйинда ғалаба келтирди (2:1).
21 ёшли форвард 80-дақиқада Жуд Беллингҳемнинг ўрнига захирадан ўйинга қўшилди, 90-дақиқада эса ҳал қилувчи гол муаллифига айланди. Бу испаниялик футболчи учун «қаймоқранглилар» сафидаги илк расмий баҳс эди.
«Тўп мен томонга қайтаётганини кўриб, ўзимга-ўзим бундай имкониятни қўлдан чиқара олмайман, дедим. Гол ура олганимдан жуда ҳам хурсандман. Кейин қайрилиб қарасам, бутун жамоа голни нишонлаяпти, – бу ҳолатни сўз билан таърифлаб бўлмайди. Мен дунёдаги энг бахтли инсонман», – дея ҳужумчи сўзларидан иқтибос келтирди Madrid Universal.
Эслатиб ўтамиз, «Реал» Карлос Эспини «Леванте»дан июл ойи охирида 25 млн евро эвазига харид қилган эди.
