Мадриднинг «Реал» клуби бош мураббийи Жозе Моуринио Винисиус Жуниорнинг Испания чемпионатидаги тўрт ўйинга дисквалификация қилинишига муносабат билдирди. Бразилиялик ҳужумчи Ла Лига 8-турида «Вилярреал»га қарши баҳсда (1:0) рақиб футболчиси Натан-Дилан Салибани сочидан тортгани учун майдондан четлатилган ва кейинчалик тўрт ўйинга дисквалификация қилинганди.
Маdrid Xtra Моуринининг сўзларини Х ижтимоий тармоғида келтирди. Португалиялик мутахассис жазо ҳақидаги хабар футболчига «Рома»га қарши Чемпионлар Лигаси баҳси бошланишидан бир соат олдин етказилганини кескин танқид қилди.
«Сизнингча, Испания клуби футболчисига тўрт ўйинлик дисквалификация ҳақида баҳс бошланишидан бир соат олдин хабар берилиши нормал ҳолатми? Буни ҳозир, ўйин олдидан ёки эртага эрталаб қилиш мумкин эмас эдими? У бу ҳақда автобусда билиши шартмиди?
Улар виждонсиз. Энди буни яширишга ҳам уринмаяпти. Улар баҳс бошланишидан бир соат олдин футболчини руҳий жиҳатдан синдиришга ҳаракат қилишди. Нима учун? Бу Испания жамоаси-ку, нега унга зарар етказишга уриниш керак?» — деди Моуринио.
Маълумот учун, Винисиус «Вилярреал»га қарши баҳсда майдондан четлатилганидан сўнг Испания чемпионатининг тўртта ўйинида иштирок эта олмайди.
