Расман: «Реал» Тебасдан истеъфога чиқишни сўради

«Реал» клуби ўз расмий сайтида баёнот эълон қилиб, Ла Лига президенти Хавиер Тебасни истеъфога чиқишга чақирди.

«Хавиер Тебас — Ла Лига президенти ва Испания Қироллик футбол федерацияси вице-президенти «Реал» раҳбарияти иш услубини нацистлар режими тарғибот вазири Йозеф Геббелснинг усуллари билан таққослаган, шунингдек, клубнинг телеканалини (Real Madrid Televisión) ушбу стратегия воситаси деб атаган баёнотларига жавобан, «Реал» клуби қуйидагиларни маълум қилади:

«Реал» Испания футболида икки масъулиятли лавозимни эгаллаб турган шахснинг клубимизни, унинг раҳбарияти ва телеканалини обрўсизлантириш мақсадида нацистлар режими тарғибот усуллари билан қиёслашини мутлақо номақбул ва ўта жиддий ҳолат деб ҳисоблайди. Бу қиёс нацистлар мафкурасига тааллуқли эмаслиги ҳақидаги изоҳ ҳам унинг чуқур ҳақоратомуз, маънавий жиҳатдан жирканч ва эгаллаб турган лавозимига номуносиб эканини ҳеч қандай тарзда ўзгартирмайди.

Ушбу баёнотлар Хавиер Тебаснинг «Реал», унинг президенти ва клуб оммавий ахборот воситаларига нисбатан мунтазам ҳужумларининг навбатдаги эпизодидир. Клубга алоқаси бўлмаган журналистларнинг саволлари, репортажлари ёки фикрларидан фойдаланиб, бизга нисбатан айбловлар илгари суриш ва учинчи шахсларнинг ҳаракатлари учун бизни жавобгар қилиб кўрсатиш мутлақо номақбулдир. Биз бу ҳаракатлар учун ҳеч қандай жавобгарликни ўз зиммамизга олмаймиз.

Тебаснинг бундай баёнотлардан «Реал» клуби ва унинг телеканали томонидан «Негрейра иши» юзасидан амалга оширилган қонуний ҳаракатларни шубҳа остига қўйиш учун фойдаланаётгани алоҳида ташвиш уйғотади.

Хавиер Тебас раҳбарлик лавозимларини эгаллаб турган икки ташкилот «Негрейра иши»нинг фавқулодда жиддийлигига муносиб чоралар кўрмагани сабабли клубимиз тўғридан тўғри UEFA'га мурожаат этишга мажбур бўлди. Биз «Барселона»нинг бир неча йил давомида ҳакамлар техник қўмитаси вице-президентига амалга оширган тўловларини ҳар томонлама текширишни, шунингдек, мусобақаларимизда ҳалоллик ва адолатни таъминлаш учун зарур чоралар кўрилишини талаб қиламиз.

Бундан ташқари, «Реал» ҳакамлик тизимини, шунингдек, Испания футбол федерациясининг бошқарув, назорат ва интизом органларини тўлиқ ислоҳ қилишга чақирмоқда. Бу жараён ўша даврда масъулиятли лавозимларни эгаллаган шахсларни алмаштиришни ҳам ўз ичига олиши керак.

Айниқса, Ла Лига президенти ва Испания Қироллик футбол федерацияси вице-президенти (ҳакамлар техник қўмитаси ҳам ушбу федерация таркибига киради) Хавиер Тебаснинг ўз лавозимидан фойдаланиб, Испания футболидаги ўта жиддий воқеаларни ҳар томонлама текшириш ва зарур ислоҳотларни ўтказишга кўмаклашиш ўрнига «Реал» клубини обрўсизлантиришга куч сарфлаётгани эътиборга моликдир.

Хавиер Тебаснинг бундай хатти-ҳаракатлари унинг бетарафлик, ҳурмат ва холислик тамойилларига амал қилмаётганини кўрсатади. Бу эса унинг лавозим мажбуриятларига зиддир. Клубимиз фикрича, Тебаснинг «Реал» Мадридга, шунингдек, шаффофлик ва ислоҳотларни қўллаб-қувватловчи шахсларга нисбатан мунтазам ҳужумлари Испания футболига жиддий зарар етказмоқда.

Шундан келиб чиқиб, «Реал» Мадрид ФК Хаиьер Тебаснинг такрорий баёнотлари ва ҳаракатлари ҳурмат, бетарафлик ҳамда ҳалоллик тамойилларига асосланган ҳар қандай Европа спорт ташкилотида номақбул деб топилишини таъкидлайди. Бундан ташқари, унинг хатти-ҳаракатлари эгаллаб турган лавозимларида фаолиятини давом эттириш учун касбий жиҳатдан нолойиқ эканини кўрсатади.

Шу муносабат билан «Реал» Мадрид ФК Хавиер Тебасдан Ла Лига президенти ва Испания Қироллик футбол федерацияси вице-президенти лавозимларидан зудлик билан истеъфога чиқишни талаб қилади.

«Реал» Мадрид ФК ўз ҳуқуқлари ва обрўсини ҳимоя қилишда давом этади. Шу билан бирга, клуб «Негрейра иши»нинг барча ҳолатларига ойдинлик киритиш ва Испания футболида зарур ислоҳотларни амалга ошириш тарафдори бўлиб қолади», — дейилади клуб баёнотида.