Арбелоа: «Ғалабага яқин эдик. Барча қарорлар «МЮ» фойдасига чиқарилди»

«Фулҳэм» бош мураббийи Алваро Арбелоа АПЛ 5-туридан ўрин олган «Манчестер Юнайтед» (1:1) билан ўйиндан сўнг ўз фикрларини билдирди.

«Ғалабага жуда яқин эдик. Яна бир бор омадимиз келмади, аммо катта жамоага қарши ўйнаш осон бўлмаслигини билардик. Шунингдек, ҳакам бутун ўйин давомида нима қилаётганини ҳам кўрдик. Кўп нарса уларнинг фойдасига ҳал бўлди. Буни Ҳарри Магуайр билан боғлиқ фол эпизодида ҳам кўриш мумкин (биринчи бўлим охирида симуляция учун Жошуа Кинг сариқ карточка олди).

Барча қарорлар уларнинг фойдасига чиқарилди. Манчестер дербисидан кейин мен ҳакамлар «Манчестер Юнайтед»нинг мағлуб бўлишини истамаётганини тушундим. Биринчи ғалабамизни қўлга киритишга жуда яқин эдик, шунинг учун ҳозир бироз хафамиз.

Менимча, биз яхши ўйин ўтказдик. Албатта, баҳс осон кечмади — охирги ўринда эдик. Аммо тўп билан муомалада ўз характеримизни кўрсата олдик, жасорат билан ҳаракат қилдик. Айрим вазиятларда ҳимояланишимизга тўғри келди, лекин умуман олганда яхши ўйнадик.

Ўтиш фазаларини ва қарши ҳужумларни назорат қилишни хоҳладик. Баъзида улар бўш ҳудудларни топа олишди. Катта жамоага қарши мураккаб ўйин бўлди ва, фикримча, мавсум охирига келиб улар турнир жадвалида юқори ўринларига яқин бўлишади.

Энди биз биринчи ғалабани қўлга киритишимиз керак. Дастлабки бешта ўйинимизга назар ташласак, аллақачон «Манчестер Юнайтед», «Челси», «Энфилд»да «Ливерпуль»га қарши ва «Сандерленд» билан ўйнадик. Олдинда октябр ойи турибди ва у биз учун жуда муҳим бўлади.

Қандай жамоа бўлишни хоҳлаётганимизни кўрсатдик. Агар шу тарзда ўйнашда давом этсак, ғалабалар ҳам келади», — деди испаниялик мутахассис Sky Sports телеканалига берган интервюсида.

Маълумот учун, беллашувни ҳакам Питер Бэнкс бошқарди.