Анвар Ғофуров: «Чинеду ижарага берилди ва «Пахтакор» томонидан бизга қанақадир миқдорда пул берилиши керак»

Суперлиганинг 15-туридаги сўнгги жуфтликлар қаторида «Қўқон-1912» ва «Сурхон» ўртасидаги учрашув ҳам бор эди. Қўқонда бўлиб ўтган ўйин тақдирини биргина гол ҳал қилди ва бу гол меҳмонлар томонидан киритилди.

Учрашувдан сўнг «Сурхон» бош мураббийи Анвар Ғофуров матбуот анжуманида иштирок этди.

- Иккала жамоага ҳам очколар жуда зарур эди. Шунга яраша иккала клуб ҳам яхши ўйин кўрсатди, деб ўйлайман. Қўқонликлар ҳам, биз ҳам бу учрашувга тайёргарлик кўргандик. Бугун бизга омад кулиб боқди. Шуни эвазига ғалаба қозондик, деб ўйлайман. Футболчилар жуда катта меҳнат қилишди. Кўп ҳаракат қилишди. Албатта, ҳаммаси ҳам ажойибу, ғаройиб эмас. Янада яхшиланиш учун ҳаракат қилишимиз керак бўлади. Узоқ йўл босиб келган «Сурхон» мухлисларига катта раҳмат. Биз уларни кутгандик. Қўллаб-қувватлаб бизга ёрдам берганликлари учун миннатдормиз.

- Гол муаллифига айланган Фридайни нега алмаштирдингиз?

- Биз майдонда ўйнаётган футболчилар билан мулоқотдамиз. Ҳолатини кўпдан-кўп сўраб турамиз. Ўзи бироз чарчаган. Биринчи таймда кўп меҳнат қилди. Шу сабаб ҳам олдига янада қўшишимиз керак эди. Чунки гол урганимиздан кейин Қўқон жамоаси ҳам вабанкка кетди. Шуни инобатга олган ҳолда кучайтиришга ҳаракат қилдик.

- «Сурхон»да ҳам бошқа жамоалар сингари молиявий муаммолар етарли. Биринчи даврадан кейин иккита етакчиси – Чинеду билан Беҳруз Каримов клубни тарк этишди. Улардан маълум миқдорда пул тушадими ёки Чинеду текинга кетдими? Беҳруз билан боғлиқ вазият қандай бўлди?

- Беҳрузни келажагини ўйлаган ҳолда Европага кетяпти. Лекин у билан боғлиқ вазият ҳақида аниқ нарса билмайман. Жамоамиздан кўпроқ футболчилар кетди. Ёшларга йўл очилди. Уларга имконият бериляпти. Ишлашда давом этамиз. Бир қанча етакчилар кетишди, бу уларнинг хоҳиши, ҳеч қандай муаммо йўқ. Уларнинг истак ва хоҳишларини тўғри тушунишимиз керак. Келажакда уларга омад тилаймиз. Биз эса ўз ишимизни давом эттиришимиз керак. Чинеду ижарага берилди ва «Пахтакор» томонидан бизга қанақадир миқдорда пул берилиши керак.