«Коринтианс» клуби ва Мемфис Депай ўртасида янги шартнома бўйича музокаралар ҳозирча тўхтаб қолган. Бу ҳақда Gazeta Esportiva нашри хабар бермоқда.
Манбага кўра, нидерландиялик 32 ёшли ҳужумчи клуб билан шартномасини яна икки мавсумга узайтиришни истамоқда. Шу билан бирга, у бир қатор ноодатий шартларни ҳам илгари сурган.
Жумладан, Депай «Нео Кимика Арена»да шахсий VIP ложага эга бўлиш, стадиондан ўз тадбирларини ўтказиш учун фойдаланиш ва ушбу тадбирлардан тушадиган даромаднинг 50 фоизини олишни талаб қилган. «Коринтианс» раҳбарияти ушбу шартларга розилик билдирган.
Бироқ клуб ҳужумчининг келаси уч йил ичида клублар ўртасидаги жаҳон чемпионатида ғолиб чиқса, ҳатто ўзи жамоани тарк этган бўлса ҳам, бонус олишни хоҳлаган. Бу шарт клуб томонидан қабул қилинмаган.
Шунингдек, келишмовчилик совринлар учун бериладиган мукофот пуллари масаласида юзага келган. Футболчи вакиллари Депай қўлга киритилган ҳар қандай соврин учун ажратиладиган мукофот маблағининг 20 фоизини олишини талаб қилмоқда. «Коринтианс» эса бундай бонус фақат футболчи мавсум давомида жамоа ўйинларининг камида ярмида иштирок этган тақдирдагина тўланиши кераклигини таъкидламоқда.
Мемфис ҳозирга қадар «Коринтианс» сафида 79 та учрашув ўтказиб, 20 та гол ва 5 та голли узатма қайд этган. Жорий мавсумда эса у 14 ўйинда 1 та гол ва 1 та ассист муаллифи бўлган.
