23 oktabr, juma kuni Superliganing 25-turi doirasida «Paxtakor» o‘z maydonida «Neftchi»ni qabul qiladi. Ushbu bahs oldidan jamoalar o‘rtasidagi o‘zaro o‘yinlar statistikasiga nazar tashlaymiz.
Ma’lumot uchun, jamoalar O‘zbekiston chempionatlari tarixida o‘zaro 63 ta bahs o‘tkazgan. Shulardan 31 tasida «Paxtakor» g‘alaba qozongan, 10 ta o‘yin durang bilan yakunlangan, 22 ta bahsda esa «Neftchi» ustun kelgan. Toshkentliklar raqib darvozasiga 104 ta gol urib, o‘z darvozasidan 71 ta to‘p olib chiqqan.
Toshkentda o‘tkazilgan bahslarda ham «Paxtakor» ustunlikka ega. «Sherlar» 22 ta g‘alabaga erishgan, «Neftchi» esa 6 bor zafar quchgan. Yana 3 ta o‘yin durang bilan yakunlangan. Toshkentliklar o‘z maydonida 61 ta gol urib, 18 ta gol o‘tkazib yuborgan.
Jamoalar o‘rtasidagi o‘zaro bahslarda «Paxtakor» 11 marta yirik g‘alabaga erishgan. «Neftchi» hisobida esa 3 ta shunday g‘alaba bor. «Sherlar»ning eng yirik g‘alabasi 6:0, farg‘onaliklarning eng yaxshi natijasi esa 4:0 hisoblanadi.
Eslatib o‘tamiz, «Paxtakor» va «Neftchi» o‘rtasidagi bahs 23 oktabr kuni Toshkentdagi «Paxtakor» stadionida soat 19:00 da boshlanadi.
Foto: Paxtakor FK
