Runi: «Messi yana jahon chempioni bo'lsa, barcha bahslarga nuqta qo'yiladi. Hattoki Ronaldu muxlislari ham hurmat qilishadi»

Angliya milliy jamoasining sobiq hujumchisi Ueyn Runining fikricha, agar Lionel Messi ikkinchi marta jahon chempionligini qo'lga kiritsa, tarixdagi eng buyuk futbolchi kim ekanligi haqidagi bahslarga nuqta qo'yadi.

Bugun, 19 iyul kuni Argentina milliy jamoasi tarkibida 39 yoshli afsona Ispaniyaga qarshi 2026 yildagi mundial finalida maydonga tushadi.

«Agar Argentina Jahon chempionatida g'alaba qozonsa, Messi barcha davrlarning eng buyuk futbolchisi ekanligi haqidagi savollarga nuqta qo'yiladi.

Menimcha, hattoki Ronalduning muxlislari ham uni hurmat qilishi kerak.

Men har doim aytganman: ikkalasidan istalganini tanlash mumkin. Ammo Messining Jahon chempionatida qilgan ishlarini o'ylab ko'ring. Oldingi mundialda ham, bu safar ham, 39 yoshida. Bu barcha bahslarga yakun yasaydi», — deya Runining so'zlarini keltiradi BBC Sport.

Eslatib o'tamiz, Ueyn Runi «Manchester Yunayted»da Krishtianu Ronaldu bilan birga o'ynagan.