«Manchester Siti» himoyachisi Raiyan Ait-Nuri qishki transfer oynasida jamoasini o‘zgartirishi mumkin. Bu haqda Daily Mail nashri xabar berdi.
Manbaga ko‘ra, «Manchester Yunayted» jazoirlik 25 yoshli futbolchini o‘z safiga qo‘shib olishni istamoqda. Ait-Nuri bu mavsumda «shaharliklar» safida yetarlicha o‘yin amaliyotiga ega bo‘lmayapti. Shu sababli u jamoasini o‘zgartirishga qarshi emas.
Eslatib o‘tamiz, Ait-Nuri 2025-yil iyun oyida «Vulverhempton»dan 31 million funt evaziga «Manchester Siti»ga o‘tgan. Uning jamoa bilan amaldagi shartnomasi 2030-yil yozigacha mo‘ljallangan. Transfermarkt portali futbolchining bozor qiymatini 35 million yevroga baholamoqda.
Bu mavsumda u barcha turnirlar doirasida 3 ta o‘yinda maydonga tushib, 3 ta golli uzatmani amalga oshirgan.
