«Real» klubi hujumchisi va Fransiya milliy jamoasi a’zosi Kilian Mbappe Xitoyning Dongpeng va Mengniu kompaniyalari bilan homiylik shartnomalaridan ayrildi. The Guardian nashri xabariga ko‘ra, bunga futbolchining internetda tarqalgan videodagi mem haqidagi izohi sabab bo‘lgan.
Videoda Mbappe o‘ziga eng kulgili tuyulgan mem haqida gapirar ekan, unda uning yuzi «qandaydir yigit — shekilli, xitoylik diktator» tasviriga qo‘yilganini aytgan. Taxminlarga ko‘ra, futbolchi Xitoyning sobiq rahbari Mao Szedunni nazarda tutgan.
Ichimliklar ishlab chiqaruvchi Dongpeng kompaniyasi futbolchi bilan hamkorlikni to‘xtatganini e’lon qildi. Kompaniya milliy tuyg‘ularni haqorat qiluvchi xatti-harakatlarga nisbatan murosasiz siyosat yuritishini ta’kidlagan.
Xitoyning eng yirik sut mahsulotlari ishlab chiqaruvchilaridan biri bo‘lgan Mengniu kompaniyasi ham shunga o‘xshash bayonot bilan chiqib, Mbappe bilan hamkorlikni to‘xtatganini ma’lum qilgan.
Ma’lumot uchun, Dongpeng ichimliklar, Mengniu esa sut mahsulotlari ishlab chiqarishga ixtisoslashgan Xitoy kompaniyalaridir.
Eslatib o‘tamiz, Mbappe 2026 yilgi «Oltin to‘p» mukofotida «Bavariya» hujumchisi va Angliya milliy jamoasi a’zosi Harri Keynga imkoniyatni boy bergan.
