«Lion» hujumchisi Endrik Fransiya chempionatining so‘nggi turida jamoa safidagi oxirgi uchrashuvini o‘tkazdi.
19 yoshli futbolchi «Lans»ga qarshi bahsni asosiy tarkibda boshladi, biroq jamoasini yirik mag‘lubiyatdan qutqara olmadi. «Lion» o‘z maydonida 0:4 hisobida imkoniyatni boy berdi.
Endrik 71-daqiqada almashtirilayotgan paytda tribunadagi muxlislar bilan xayrlashdi. Uning ijara shartnomasi mavsum yakunida nihoyasiga yetadi.
Braziliyalik futbolchi «Lion» safiga yanvar oyida qo‘shilgandi. U fransuz klubi safida jami 21 uchrashuvda maydonga tushib, 8 ta gol va 8 ta assist qayd etdi.
Endi Endrik yangi mavsumni Madridning «Real» klubida boshlaydi. Futbolchining «qaymoqranglilar» bilan amaldagi shartnomasi 2030 yilgacha mo‘ljallangan.
