«Лион» ҳужумчиси Эндрик Франция чемпионатининг сўнгги турида жамоа сафидаги охирги учрашувини ўтказди.
19 ёшли футболчи «Ланс»га қарши баҳсни асосий таркибда бошлади, бироқ жамоасини йирик мағлубиятдан қутқара олмади. «Лион» ўз майдонида 0:4 ҳисобида имкониятни бой берди.
Эндрик 71-дақиқада алмаштирилаётган пайтда трибунадаги мухлислар билан хайрлашди. Унинг ижара шартномаси мавсум якунида ниҳоясига етади.
Бразилиялик футболчи «Лион» сафига январ ойида қўшилганди. У француз клуби сафида жами 21 учрашувда майдонга тушиб, 8 та гол ва 8 та ассист қайд этди.
Энди Эндрик янги мавсумни Мадриднинг «Реал» клубида бошлайди. Футболчининг «қаймоқранглилар» билан амалдаги шартномаси 2030 йилгача мўлжалланган.
