O‘zbekiston Professional futbol ligasi (PFL) Superliganing 14-turidan o‘rin olgan «Bunyodkor» — «Paxtakor» uchrashuvi boshqa stadionda o‘tkazilishini ma'lum qildi.
Liga bayonotiga ko‘ra, «Bunyodkor» stadioni maysasi hali to‘liq tiklanmagan. Shu sababli Toshkent derbisi «Paxtakor» stadioniga ko‘chirildi.
Avvalroq Superliganing 12-turidagi «Bunyodkor» — «Nasaf» bahsi ham xuddi shu sabab tufayli «Olimpiya» stadionida tashkil etilgandi.
PFLning ta'kidlashicha, yozning jazirama ob-havosi tufayli mamlakatdagi bir qator stadionlar maysasida muammolar yuzaga kelgan. Agronomlar «Bunyodkor» stadioni chimini mavsumning ikkinchi qismiga tayyorlash ustida ishlayotgan bo‘lsa-da, Liga ishchi guruhi maydonni hozircha Superliga talablariga javob bermaydi, deb topgan.
Shu bois «Bunyodkor»ga kamida yana bir tur o‘z stadionida rasmiy bahs o‘tkazishga ruxsat berilmaydi.
Qayd etish joiz, PFL avval ham Termiz va Buxorodagi stadionlar maysasi talab darajasida bo‘lmagani sababli ayrim bahslarni boshqa shaharlarga ko‘chirishga majbur bo‘lgandi.
Muxlislar bu yangilikni Telegram’da muhokama qilmoqda
Izohlar Telegram’da ochiladi