«Bavariya» klubi hujumchi Harri Keyn bilan muzokaralarni boshlashga tayyor. Bu haqda The Times nashri xabar berdi.
Manbaga ko'ra, angliyalik 33 yoshli futbolchi Myunxen klubida qolishga qaror qilgan. Tomonlar 2029 yilning yoziga qadar bitimni uzaytirish bo'yicha muzokaralarni boshlashi kutilmoqda.
Hozirda futbolchining amaldagi bitimi 2027 yilning yozida nihoyasiga yetadi.
Shartnoma uzaytirilgan taqdirda Keynning maoshida sezilarli o'zgarish bo'lishi kutilmayapti. Hozirda u yiliga taxminan 25 million yevro ishlab topadi.
Futbolchi «Bavariya»dagi eng yuqori maosh oluvchilardan biri hisoblanadi.
Ma'lumot uchun, Keyn 2023 yil yozida «Tottenhem»dan «Bavariya»ga ko'chib o'tgan.
