«Chelsi» yarimhimoyachisi Koul Palmer faoliyatini Ispaniyada davom ettirishi mumkin. Bu haqda Caught Offside xabar bermoqda.
Manba ma'lumotiga ko‘ra, 23 yoshli angliyalik futbolchiga «Barselona» jiddiy qiziqish bildirmoqda. Kataloniya klubi yozgi transfer oynasida Palmerni xarid qilish bo‘yicha taklif bilan chiqish imkoniyatini ko‘rib chiqmoqda.
Palmer 2023 yilda «Manchester Siti»dan «Chelsi»ga 47 million yevro evaziga ko‘chib o‘tgan. Uning londonliklar bilan tuzgan amaldagi shartnomasi 2033 yil 30 iyungacha amal qiladi.
2025/26 yilgi mavsumda Palmer barcha musobaqalarda 34 ta bahsda maydonga tushib, 11 ta gol va 3 ta assist qayd etdi. Transfermarkt portali futbolchining transfer qiymatini 100 million yevro deb baholamoqda.
Eslatib o‘tamiz, hozircha «Barselona» va «Chelsi» ushbu ehtimoliy transfer yuzasidan rasmiy bayonot bergani yo‘q. Shu sababli bu ma'lumot mish-mish sifatida baholanmoqda.
