"Barselona" 2029 yilgi YChL finali mezbonligi uchun ariza topshirdi

"Barselona" klubi rasmiy ravishda 2029 yilgi UEFA Chempionlar ligasi finali mezbonligini olish uchun ariza topshirganini ma'lum qildi.

Klub bayonotida ta'kidlanishicha, bu nomzodlik kataloniyaliklarning yirik xalqaro tadbirlarni o'tkazishdagi boy tajribasini, shuningdek, "Spotify Camp Nou"ning jahondagi darajadagi stadion ekanini yana bir bor namoyon etadi.

Ma'lum qilinishicha, xalqaro futbolning eng muhim uchrashuvlariga mezbonlik qilish bo'yicha uzoq tarixga ega bo'lgan va hozirda keng ko'lamli modernizatsiya ishlari olib borilayotgan "Spotify Camp Nou" dunyodagi eng zamonaviy, innovatsion va nufuzli sport inshootlaridan biriga aylanishi kutilmoqda. Shu sababli u Chempionlar ligasi finalini qabul qilish uchun barcha zarur imkoniyatlarga ega deb baholanmoqda.

Stadion UEFA tomonidan tarixan eng yuqori toifadagi arena sifatida tan olingan bo'lib, u Yevropadagi eng katta sig'imga ega futbol stadioni hisoblanadi.

Endilikda klub va loyihada ishtirok etayotgan muassasalar tanlov jarayoni doirasida UEFA'ning yakuniy qarorini kutishmoqda. 2029 yilgi Chempionlar ligasi finali o'tkaziladigan stadion shu yilning to'rtinchi choragida e'lon qilinishi rejalashtirilgan.