«Барселона» 2029 йилги ЕЧЛ финали мезбонлиги учун ариза топширди

«Барселона» клуби расман 2029 йилги UEFA Чемпионлар лигаси финали мезбонлигини олиш учун ариза топширганини маълум қилди.

Клуб баёнотида таъкидланишича, бу номзодлик каталонияликларнинг йирик халқаро тадбирларни ўтказишдаги бой тажрибасини, шунингдек, «Spotify Camp Nou»нинг жаҳон даражасидаги стадион эканини яна бир бор намоён этади.

Маълум қилинишича, халқаро футболнинг энг муҳим учрашувларига мезбонлик қилиш бўйича узоқ тарихга эга бўлган ва ҳозирда кенг кўламли модернизация ишлари олиб борилаётган «Spotify Camp Nou» дунёдаги энг замонавий, инновацион ва нуфузли спорт иншоотларидан бирига айланиши кутилмоқда. Шу сабабли у Чемпионлар лигаси финалини қабул қилиш учун барча зарур имкониятларга эга деб баҳоланмоқда.

Стадион UEFA томонидан тарихан энг юқори тоифадаги арена сифатида тан олинган бўлиб, у Европадаги энг катта сиғимга эга футбол стадиони ҳисобланади.

Эндиликда клуб ва лойиҳада иштирок этаётган муассасалар танлов жараёни доирасида UEFA'нинг якуний қарорини кутишмоқда. 2029 йилги Чемпионлар лигаси финали ўтказиладиган стадион шу йилнинг тўртинчи чорагида эълон қилиниши режалаштирилган.