Каннаваро: «Бизда эркин ролдаги футболчилар йўқ»

Ўзбекистон миллий жамоаси бош мураббийи Фабио Каннаваро Эронга қарши ўртоқлик баҳсидан кейин матбуот анжуманида иштирок этди.

- Икки марказий ҳимоячи билан ўйнашга ўтдик. Бу Сречко Катанец кетганидан кейин амалга ошди. Бундай тактикада иккита ҳимоячида ўйнашдан қўрқмайсизми?

- Йўқ, чунки замонавий футбол айнан шундай тузилган. Айтайлик, сиз олдинга чиқиб, рақибни ортингизда қолдириб, чизиқни бузишдан қўрқсангиз, у ҳолда кўпроқ қийналасиз. Шуни ҳисобга олиб, уларга прессинг қилишга қарор қилдик, ҳимоячиларга олдинга чиқишни ва қўрқмасликни айтдик. Ҳаммаси барибир жамоанинг қандай ишлашига боғлиқ. Агар бизнинг яримҳимоячилар ва ҳужумчилар тўғри прессинг қилса, биз муаммосиз майдоннинг ўша қисмигача кўтарила оламиз. Ўйлайманки, биринчи бўлимда рақибга яхши босим ўтказдик, муаммоларни ярата олдик. Жаҳон чемпионатини унутишимиз керак. Бу турнирда биз ҳар қандай рақибга дуч келишимиз мумкин ва бунга тайёр бўлишимиз шарт».

- Азиз Ғаниев узоқ вақт ўйнамаган позицияда — марказда, хоҳлаган жойига ҳаракат қилиб эркин ўйнади. У сизнинг кўрсатмаларингизни бажара олмадими ёки сиз унга майдонда шунчалик эркинлик бердингизми?

- Йўқ, йўқ. Ҳеч кимда эркинлик йўқ. Такрор айтаман, биз эркин футбол ўйнамаймиз, биз ўз тизимимизга ишонамиз. 4-3-3 схемасида ўйнаш учун жуда динамик бўлиш керак. Қачон чизиқда қолишни, қачон қанотга ўтишни ва қачон ҳимоячилар ортига югуришни тушунишингиз шарт. Ҳакимов билан ҳам, Азиз билан ҳам бизда муаммо йўқ — уларнинг иккаласи ҳам яримҳимоячи ва иккинчи бўлимда Азиз ҳам худди шу ишни бажарди. Бизда эркин ролдаги футболчилар йўқ. Албатта, сизда Ўрунов каби футболчилар бўлса, уларда бу тизимда қанотларда ўйнаш бўйича етарлича тажриба бўлмаслиги мумкин, аммо биз бундан максимал даражада фойдаланишга ҳаракат қиляпмиз. Келажакда балки яна 4 та ҳимоячи билан ўйнармиз. Мен учун 4-3-3 схемаси муаммо эмас, барчаси рақибга боғлиқ», - деди Каннаваро ўйиндан кейинги матбуот анжуманида.