«Манчестер Сити» собиқ ҳужумчиси Серхио Агуеро Англия Премер-лигаси ва Чемпионлар лигасини солиштирди. Аргентиналик футболчи АПЛдаги баҳслар жисмоний жиҳатдан Европа мусобақасидаги ўйинларга қараганда қийинроқ кечишини айтди.
«Премер-лига ниҳоятда талабчан мусобақа. У Чемпионлар лигасига қараганда анча кўпроқ жисмоний куч талаб қилади. АПЛдаги барча баҳслар жисмоний жиҳатдан жуда қийин», — деди Агуеро Stake Football нашрига берган интервюсида.
Футболчининг таъкидлашича, Лигалар чемпионлар лигасида жамоалар тўпни ўз назоратида ушлашга ва ҳужумларни ўз жарима майдонидан бошлашга кўпроқ интилади. Шу сабабли айрим баҳсларда ўйин услуби АПЛдагидан фарқ қилади.
«EЧЛда барча жамоалар яхши ўйнайди, ҳужумларни ўз дарвозаси яқинидан бошлашга ва тўпга эгалик қилишга ҳаракат қилади. Шунинг учун у ерда бироз осонроқ. Премер-лига эса бошқа турдаги футбол. Ҳатто охирги ўриндаги жамоа ҳам сени мағлуб этиши ёки ҳаётингни анча қийинлаштириши мумкин», — деди аргентиналик собиқ ҳужумчи.
Маълумот учун, Агуеро Европадаги фаолияти давомида «Атлетико», «Манчестер Сити» ва «Барселона» клублари сафида ўйнаган. У АПЛда 275 та баҳсда иштирок этиб, 185 та гол урган ва 48 та голли узатмани амалга оширган. Чемпионлар лигасида эса 79 та баҳсда 41 та гол ҳамда 8 та голли узатма қайд этган.
