Португалия миллий жамоаси бош мураббийи Жорже Жезуш ҳужумчи Гонсалу Рамушнинг жамоадаги ўрни ва мақоми ҳақида фикр билдирди. Мутахассис футболчининг сўнгги икки баҳсда гол ура олмагани ва унчалик яхши ўйнамагани ҳақидаги фикрларни муҳокама қилиш мумкинлигини, бироқ унинг олти ўйин давомидаги иштирокини бундай баҳолаб бўлмаслигини айтди.
«Гонсалу Рамуш ҳақида гапирадиган бўлсак, агар Данияга қарши баҳс ва бугунги ўйинни назарда тутаётган бўлсангиз, у Данияда гол урганди-ку. Шу сабабли Рамуш сўнгги икки баҳсда гол урмади ва яхши ўйнамади, десангиз, буни муҳокама қилишимиз мумкин. Аммо барча олти ўйинни ҳисобга олсак, бундай эмас. У бир нечта баҳсда жуда яхши ўйнади», — деди Жезуш матбуот анжуманида.
Мураббий футболчининг жамоадаги мақоми унинг фаолияти давомида эришган хизматларига қараб белгиланишини таъкидлади. У Криштиану Роналду билан бир қаторда Бруню Фернандеш, Бернарду Силва ва Рубен Диаш каби футболчиларни ҳам алоҳида эътироф этди.
«Мен учун футболчининг мақоми унинг бутун фаолияти давомида қилган хизматлари билан белгиланади. Гап фақат Криштиану Роналду каби алоҳида мақомга эга футболчилар ҳақида кетмаяпти. Мен ҳам футболчи бўлганман ва кўп йиллар давомида ўз мақомига лойиқ бўлган инсонларни жуда ҳурмат қиламан. Масалан, Бруню Фернандеш, Бернарду Силва ва Рубен Диаш. Бундай футболчилар сони тобора ортиб бормоқда. Бу мен учун жуда муҳим, чунки ўзим ҳам футбол ўйнаганман ва футболчилар қандай фикрлашини биламан», — дея қўшимча қилди мураббий.
Маълумот учун, Португалия миллий жамоаси Миллатлар лигаси доирасида Уелсни 3:2 ҳисобида мағлуб этди ва гуруҳда биринчи ўринни эгаллади.
Мухлислар бу янгиликни Telegram’да муҳокама қилмоқда
Изоҳлар Telegram’да очилади