«Барселона»нинг бразилиялик ҳужумчиси Габриэл Жезус ёзги трансфер ойнасида Италиянинг «Наполи» клубига ўтишга жуда яқин келган. Бу ҳақда Diario SPORT нашри хабар берди.
Маълум қилинишича, 29 ёшли футболчи «Арсенал»дан «Наполи»га трансфери амалга ошишини 6 ҳафта давомида кутган. Бироқ Италия клуби лондонликлар билан келишувга эриша олмаган ва музокаралар самарасиз якунланган.
Вазиятдан «Барселона» фойдаланиб қолган. Каталонияликлар трансфер жараёнига аралашиб, ёзги трансфер ойнасининг сўнгги кунида Жезусни атиги 10 миллион еврога сотиб олишга муваффақ бўлган.
Маълумот ўрнида, бразилиялик ҳужумчи ушбу мавсумда «Барселона» сафида барча мусобақалар доирасида 10 та учрашувда майдонга тушди. Ушбу баҳсларда у 4 та гол уриб, 2 та голли узатмани амалга оширди.
Жезуснинг Каталония клуби билан амалдаги шартномаси 2029 йилнинг ёзигача мўлжалланган.