«Реал» футболчиси Винисиус Жуниор Чемпионлар Лигасида «Рома»га қарши ўйиндан (4:3) сўнг Ла Лигадаги дисквалификацияси ҳақида гапирди. Футболчи «Валенсия»га қарши баҳсда (1:0) рақиб футболчиси Натан Салибани сочидан тортгани учун қизил карточка олган эди.
«Дисквалификация ҳақида эълон қилиш учун уларда бутун бир кун бор эди. Лекин чемпионатнинг тўртта учрашувини ўтказиб юборишимни стадионга етиб келганимиздагина айтишди.
Бизга ҳеч қачон сочдан тортиш билан боғлиқ қоида тушунтирилмаган. Ла Лига ва ҳакамлар қўмитаси вакиллари мунтазам равишда олдимизга келиб, қоидаларни тушунтиришади, аммо айнан бу ҳолат ҳеч қачон муҳокама қилинмаган.
Натижада мен қизил карточка олдим, тамом. Мен ҳеч қачон бошқа футболчиларга нисбатан тажовузкорлик қилмаганман.
Мени ҳам тез-тез уришади, аммо охир-оқибат карточкани айнан мен оламан», — дея Винисиуснинг сўзларини келтиради ESPN нашри.
Маълумот ўрнида, бразилиялик футболчи Ла Лиганинг навбатдаги тўртта учрашувини ўтказиб юборади. У «Севиля», «Барселона», «Расинг» ва «Валенсия»га қарши баҳсларда жамоасига ёрдам бера олмайди.
