«Манчестер Юнайтед» ҳимоячиси Лисандро Мартинес клуб раҳбариятини танқид қилганидан кейин жамоа кийиниш хонасида қарама-қарши фикрлар пайдо бўлди.
Аргентиналик футболчи Чемпионлар Лигасининг 2-турида «Атлетико»дан (0:2) учралган мағлубиятдан сўнг жамоа таркиби етарлича кучли эмаслигини очиқ айтди.
28 ёшли ҳимоячининг фикрича, клуб раҳбарияти трансферлар борасида нотўғри қарорлар қабул қилган ва бу мавсумнинг дастлабки ойларидаги омадсиз натижаларга сабаб бўлган.
Журналист Самуэл Лакхёрстнинг маълумотига кўра, Мартинеснинг сўзлари жамоа аъзоларини икки гуруҳга ажратган. Айрим футболчилар ҳимоячининг очиқ гапирганини маъқуллаган бўлса, бошқалар унинг жамоадошларини омма олдида танқид қилганидан норози бўлган.
Аввалроқ «қизил иблислар» Мартинесни клуб раҳбариятини танқид қилгани учун жаримага тортиши мумкинлиги ҳақида хабар берилганди.
Маълумот ўрнида, «Манчестер Юнайтед» навбатдаги учрашувни АПЛ доирасида «Лидс»га қарши ўтказади. Ушбу баҳс 18 октябр куни Тошкент вақти билан соат 18:00 да бошланади.
