Италиялик мутахассис Антонио Конте Майкл Кэррик ўрнига «Манчестер Юнайтед» бош мураббийи этиб тайинланиши мумкин. Бу ҳақда журналист Даниэле Лонго хабар берди.
Манбага кўра, агар «қизил иблислар»нинг амалдаги устози яқин вақт ичида жамоа натижаларини яхшилай олмаса, у истеъфога чиқарилиши эҳтимоли бор. Конте манкунианликлар бош мураббийи бўлишни истамоқда. Италиялик 57 ёшли мутахассис Англия Премер-лигасида яна бир бор ўзини синаб кўришга тайёр.
Аввалроқ Антонио «Челси» ва «Тоттенҳэм» клубларида ишлаган. Ортда қолган ёзда у «Наполи»ни тарк этганидан буён ишсиз қолмоқда.
Эслатиб ўтамиз, «Манчестер Юнайтед» Чемпионлар лигаси доирасида Мадриднинг «Атлетико» клубига 0:2 ҳисобида мағлуб бўлди. Натижада Кэррикнинг истеъфога чиқиши ҳақидаги хабарлар кўпайиб кетди.
