Германиянинг «Штутгарт» клуби ҳимоячиси Финн Елч 2026/2027 йилги мавсум якунида Европанинг топ клубларидан бирига ўтиши мумкин. Бу ҳақда журналист Экрем Конур хабар берди.
Маълум қилинишича, 20 ёшли футболчи учун Мадриднинг «Реал» ва Каталониянинг «Барселона» клублари, шунингдек, «Бавария», «Арсенал» ҳамда «Интер» жамоалари кураш олиб боради. Эҳтимолий трансфер қиймати 50–60 миллион еврони ташкил этиши мумкин.
Қайд этиш лозим, Елч 2025 йил феврал ойидан буён «Штутгарт» шарафини ҳимоя қилиб келмоқда. Transfermarkt портали футболчининг трансфер нархини 35 миллион еврога баҳоламоқда. Унинг клуб билан шартномаси 2030 йил июн ойи охиригача мўлжалланган.
Маълумот ўрнида, ушбу мавсумда германиялик ҳимоячи Бундеслигада бешта учрашувда майдонга тушиб, битта голли узатмани амалга оширди. Аввалроқ «Барселона» ва «Реал» «Манчестер Юнайтед»нинг 15 ёшли футболчиси учун курашаётгани маълум қилинганди.
