ФИФА 1965-сонли циркулярни эълон қилиб, 2026 йилги Жаҳон чемпионати саралаш ва финал босқичларида иштирок этган футболчилари учун клубларга тўланадиган компенсациялар ҳақида маълумот берди.
Ҳужжатга кўра, саралаш босқичи учун ФИФА томонидан жами 100 миллион АҚШ доллари ажратилган.
Мазкур маблағ тақсимоти натижасида клуб ўз футболчисининг Жаҳон чемпионати саралашидаги ҳар бир расмий баҳс қайдномасига киритилгани учун тахминан 2362 АҚШ доллари миқдорида компенсация олади.
Муҳим жиҳати шундаки, футболчи майдонга тушган ёки тушмаганидан қатъи назар, агар у учрашув қайдномасидан жой олган бўлса, клубга тўлов амалга оширилади.
Ўзбекистон Профессионал футбол лигаси ҳисоб-китобларига кўра, Суперлига клублари миллий жамоаларга юборган футболчилари сонидан келиб чиқиб маълум миқдорда компенсация олади. Бироқ якуний рақамлар ФИФА томонидан тасдиқланганидан сўнг айрим тафовутлар юзага келиши мумкин.
Шунингдек, ФИФА Жаҳон чемпионатининг финал босқичи учун яна 250 миллион АҚШ доллари ажратган.
Унга кўра, клублар мундиалнинг якуний босқичига киритилган футболчилари учун ҳар бир кун ҳисобидан тахминан 5000 АҚШ доллари миқдорида компенсация олади.
Маълумот учун, Ўзбекистон миллий жамоаси тарихда илк бор Жаҳон чемпионати финал босқичида иштирок этади. Шу сабабли Суперлига клублари ҳам мундиал давомида қўшимча даромад олиш имкониятига эга бўлади.
