«Страсбург» португалиялик мутахассисни бош мураббий этиб тайинлади

«Страсбург» клуби Угу Оливейрани жамоа бош мураббийи этиб тайинлаганини эълон қилди.

Клуб баёнотида таъкидланишича, португалиялик мутахассис ҳужумкор ва замонавий футболга содиқлиги билан танилган. Унинг жамоалари ташаббусни ўз қўлида ушлаш, тўпни ва ўйин суръатини назорат қилиш, шунингдек, тўпни тезда қайтариб олиш учун юқори босим (прессинг) қўллаши билан ажралиб туради.

«Бу ерда, Страсбургда бўлиш ва тарихи ҳамда юксак мақсадлари уйғунлашган шундай ажойиб лойиҳанинг бир қисмига айланиш — мен учун катта шараф. Меухлисларга ёрқин ҳис-туйғулар улашишни, унутилмас хотиралар яратишни ва клубнинг янада ривожланиши учун бор кучимни сарфлашни истайман», — дея Оливейранинг сўзларини келтиради француз клуби матбуот хизмати.

Оливейранинг сўнгги иш жойи «Фамаликан» бўлиб, у жамоани ўтган мавсумда Португалия Примейра-лигаси доирасида клуб тарихидаги энг яхши натижа — 5-ўринга олиб чиққан.

Шунингдек, Угу аввалроқ 7 йил давомида Марку Силванинг мураббийлар штабида фаолият юритиб, у билан «Фулҳэм», «Эвертон», «Ҳалл Сити» ва «Уотфорд» клубларида биргаликда ишлаган.