«Ювентус» бош мураббийи Лучано Спаллетти Италия чемпионатининг 8-туридан ўрин олган «Лечче»га қарши учрашув (2:0) якунлари ҳақида фикр билдирди.
«Футболчилар жуда яхши ўйин ўтказишди. Улар рақибга ўйин боришини назорат қилиш имконини бермасликка интилди ва биринчи бўлимда бир нечта хавфли вазиятлар яратди.
Бироқ иккинчи бўлимда ўйинни бошқариш борасида бироз сустлашдик. Ҳужумларни ривожлантиришда камроқ тўғри қарорлар қабул қилдик ва дадилроқ ҳаракат қилишдан тийилдик. Чунки учрашувни аллақачон назоратимизга олдик, деб ўйладик.
«Лечче» тактик жиҳатдан бир нечта ўзгаришларни амалга оширди. Бундай вазиятларда жасорат билан ҳаракат қилиш керак, аммо шу билан бирга ўйиндаги тартиб-интизомни ҳам йўқотмаслик лозим. Рақибга ҳеч қандай имконият бермадик, лекин ғалабани мустаҳкамлашга қаратилган ҳаракатларимизда фаоллик камайди. Бироқ замонавий футболнинг ўзи шундай. Биз биринчи бўлимда қандай ўйнаган бўлсак, учрашув давомида ҳам шу тарзда ҳаракат қилишимиз керак», — дея Спаллеттининг сўзларини келтирмоқда клуб расмий сайти.
Бу ғалабадан сўнг «Ювентус» 14 очко билан турнир жадвалининг олтинчи поғонасидан жой олган.
